Störf þingsins.
Herra forseti. Á föstudag héldu Sameinuðu þjóðirnar Alþjóðlegan dag fjölmiðlafrelsis. Á þeim degi er blaðamönnum um heim allan fagnað og þakkað hlutverk sitt í lýðræðissamfélögum, sem er mikilvægt.
Fjölmiðlar hafa það hlutverk að veita stjórnvöldum aðhald. Á hinn bóginn verður almenningur að geta gert þá kröfu að slík umfjöllun sé hlutlaus og ekki valkvæð. Þetta á ekki síst við um Ríkisútvarpið sem hefur beinlínis það hlutverk að vera vettvangur fyrir mismunandi skoðanir á málum sem varða almenning og vera óháð stjórnmálalegum hagsmunum í efnismeðferð og ritstjórnarákvörðunum. Í ljósi þessa skaut það skökku við þegar fréttir bárust af því að fréttainnslag, sem fjallaði um samninga Reykjavíkurborgar við olíufélög vegna lóða, yrði ekki lengur sýnt í fréttaskýringaþættinum Kveik líkt og til stóð.
Það er í mínum huga morgunljóst að viðfangsefni innslagsins eigi erindi við almenning. Íbúar Reykjavíkurborgar eiga rétt á að vera upplýstir um slíkar ráðstafanir og þá sér í lagi þegar milljarðar eru undir. Það er aftur á móti talsverðum vafa undirorpið hvers vegna fréttaskýringin hafi ekki verið sýnd í Kveik. Af hálfu Ríkisútvarpsins hafa verið nefndar einhverjar hálfkveðnar útskýringar um óklárað verk sem margir klóra sér í hausnum yfir nú eftir að hafa séð innslagið, sem var með ágætum.
Með fullri virðingu, herra forseti, verður að viðurkennast að það er ekki hægt að segja að allar fréttir og fréttainnslög þeirrar stofnunar hingað til hafi einungis farið í birtingu eftir að hafa verið ritrýndar af fimm hlutlausum fagaðilum eða eitthvað slíkt, svo ekki sé dýpra í árinni tekið. Í mínum huga, forseti, skuldar Ríkisútvarpið skýringar á þeim ákvörðunum sem þarna bjuggu að baki. Það er lágmark að gera þá kröfu að það sé engum vafa undirorpið að Ríkisútvarpið, fjölmiðill í almannaþágu, fylgi lögum og ræki hlutverk sitt af fagmennsku og heilindum.
